Shqipëria merr autorizimin nga Bashkimi Europian, rritet numri i fluturimeve të riatdhesimit
Numri i fluturimeve të riatdhesimit do të rritet pas lejes që Shqipëria ka marrë nga autoritetet përkatëse të Bashkimit Europian.
Lajmin e ka dhënë Kryeministri Edi Rama gjatë konferencës së përbashkët me ambasadorin e BE-së në Shqipëri, Luigi Soreca-n.
Gjithashtu Rama njoftoi edhe njjëherë se duke filluar nga java e ardhshme të riatdhesuarit nuk do të karantinohen në hotele por mund ta bëjnë karantinimin në shtëpitë e tyre.
“Mbrëmë kemi marrë autorizimin nga Agjencia e SIgurisë Ajrore nga BE që deri në 15 qershor na mundëson rritjen e numrit të fluturimeve për riatdhesimet, sepse ishte një nga problemet e mëdha që kishim. Duke filluar nga dita e hënë nuk do të jetë më e nevojshme që të riatdhesuarit të karantinohen nëpër hotele, por të riatdhesuarit mund tëkarantinohen në shtëpitë e tyre. Qëllimi është që deri në fund të kësaj jave që vjen të kemi një relaksim të mëtejshëm dhe pas 18 majit të lehtësojmë lëvizjen edhe jashtë kufijve”, u shpreh Rama.