DEBATET/ Pjerin Ndreu përplaset me Sandër Lleshajn: Nuk jemi ushtarë rreshti ne, harrojeni! Ndërhyn Klosi

Kryebashkiaku i Lezhës, Pjerin Ndreu, është përplasur sot me ministrin e Brendshëm Sandër Lleshaj, për prishjen e ndërtimeve pa leje.

Ndreu ka thënë se IKMT nuk mund të prishë e të bëjë rrëmujë, pa pyetur kryebashkiakët.

“Barra për të përgatitur këtë sezon turistik bie mbi bashkitë, mbi ne. Nuk mund të ndodhë që të vijë IKMT e të bëjë rrëmujë e bashkia të mos ketë dijeni, kjo është e parregullt. 

IKMT duhet të vijë dhe të na informojë. Nëse vjen ti, ti më shkatërron turizmin. Nëse bëhet kjo, unë si bashki refuzoj të marr pjesë në të tilla aksione.

Ne nuk jemi ushtar rreshti. Nëse ju mendoni se jemi polici rreshti, harrojeni. Kemi punën tonë. Është bërë izolimi i kompetencave të pushtetit lokal. 

Duhet të biem dakord me pushtetin lokal. Ka 30 vjet objekti pa leje dhe tani në kohën e turizmit e shkatërrojmë. Bashkia është institucion serioz e ju duhet ta konsideroni atë”- tha Nreu.

Lleshaj iu përgjigj Ndreut se IKMT është një institucion që i përgjigjet ligjit dhe se nuk merr leje për veprimet që bën as te ministri dhe as te kryebashkiakët.

“IKMT është një institucion serioz, që mban përgjegjësinë në një vend të pushtuar nga paligjshmëria. IKMT është përballur me paligjshmërinë dhe krimin në vend e këtë detyrë do të vazhdojë ta ruajë. 

IKMT ka marrëdhënie të drejtpërdrejta me shkelësin e ligjit dhe nuk ka raport me kryebashkiakun. IKMT do ta vazhdojë këtë punë në funksion të ligjit, me vendosmëri. 

IKMT e policia veprojnë drejtpërdrejtë dhe nuk marrin autorizim as nga ministri as nga kryetari i bashkisë, as nga Zoti vetë, por vetëm i përmbahen ligjit.

IKMT ka ndërhyrë për cilësinë më të mirë të turizmit. Ndërhyrja është që të kemi një bregdet jo afrikan, por europian. Nuk duhen ndërtime pa leje, nuk ka cuba që pushtojnë plazhin, por ka rregull e ka standarde europiane. 

Jemi një vend që duhet të afrohemi me BE e duhet që të kemi standarde europiane.”– tha Lleshaj.

Në këtë moment ndërhyri ministri i Turizmit Blendi Klosi, i cili kërkoi që në këtë pikë mbledhja të zhvillohet pa praninë e gazetarëve.

Më parë ministri Lleshaj pati debate dhe me kryebashkiaken pa mandat të Shkodrës, Voltana Ademi.

Kjo e fundit ka pretenduar se Inspektoriati Kombëtar i Mbrojtjes së Territorit po bën prishje selektive dhe të panjoftuara.

“IKMT ka ardhur sot në Shkodër, dhe duhet të them se duhet që të njoftoheshin përpara. Unë kërkoj që të gjithë qytetarët duhet të veprohet njëlloj. 

Kam komunikime nga Shkodra, se për dikë veprohet dhe për dikë tjetër jo. Duhet vendim-marrja për të gjithmonë njësoj, për të mos shkaktuar qoftë konflikte në territor apo situata që janë të pamenaxhuara. 

Aq më tepër që tani jemi në fillim të sezonit veror”, u shpreh Ademi.

Lleshaj nga ana tjetër u shpreh se i vlerësonte konstatimet e saj, por nguli këmbë që është përgjësia e IKMT-së të bëjë prishjet e paligjshme, dhe kjo gjë ishte e panegociueshme.