VIDEO/Fatura 109 milionë euro për Bechettin, ish zv/kryeministrja: Çfarë po humbim nga lufta personale e Ramës?
Ish-Avokatja e Shtetit, Ledina Mandija tregon çfarë mund të ishte bërë me 109 milionë euro që kryeministri Rama humbi në përballjen me sipërmarrësin italian Francesco Bechetti. Përmes një video, zonja Mandija, a angazhuar në Partinë Demokratike si anëtare e Këshillit Kombëtar, bëri përgjegjës kryeministrin që shndërroi një luftë personale në një gjobë të rëndë për Shqipërinë.
Mandija ka qenë edhe zv/kryeministre në kohën e qeverisjes tranzitore në vitin 2017, ku pas marrëveshjes mes Ramës dhe Bashës, PD-ja mori postet e rëndësishme në qeverinë socialiste, deri në fazën e përfundimit të zgjedhjeve parlamentare.
Statusi i plotë:
Kryeministri në ikje po dëmton çdo ditë interesin publik. Lufta e tij personale me sipërmarrësin italian Francesco Bechetti do ti kushtojë të gjithëve shqiptarëve plot 109 milionë euro!
Edi Rama vendosi interesat e tij personale mbi ligjin dhe interesat e vendit, dhe për dëmin që ai shkaktoi shqiptarët e varfëruar duhet të paguajnë gjobën 109 milionë euro, në vend që këto para ti mbanin për vete.
Ky është krim. Dëmi ekonomik i shkaktuar nga Edi Rama po e vret ekonominë dhe po zbraz xhepat e shqiptarëve.
Shikoni sa familje dhe biznese mund të ishin ndihmuar me kaq shumë para? Sa shkolla dhe spitale mund të ishin ndërtuar? Sa njerëz mund të ishin ndihmuar:?
Të dhënat në video:
Shqiptarët janë duke paguar me taksat e tyre luftën personale të Kryeministrit Edi Rama, me pronarin e Agon Channel Francesco Beçhetti. Shteti shqiptar do t’i paguajë 109 milionë euro. Edi Rama nuk flet për dëmin e drejtpërdrejt që u ka shkaktuar qytetarëve!
Ndërkohë, Me 109 milionë euro mund të ishin ndërtuar 7 spitale te rinj, 100 shkolla të reja, 200 kopshte dhe çerdhe të reja. Me 109 milionë euro, mund të ishin blerë 4.500 respiratorë për t’u përballur me pandeminë. Mund të ishin kryer 726.666 testime për COVID-19. Me 109 milionë euro, mund të jepeshin 235 euro subvencione të drejtpërdrejta për 463.550 fermerët e punësuar në sektorin bujqësor! Mund të dyfishohej për 3 vite ndihma ekonomike për 60 mijë familje shqiptare.